AzərTAc dövlət informasiya agentliyi sovet dövründən qalmış əmanətlərin hansı qaydada
qaytarılacağına dair prezidentin fərmanını yayıb.
2012-ci il martın 14-də Azərbaycan prezidenti İlham Əliyev keçmiş SSRİ-nin əmanət bankının Azərbaycan Respublikasının vətəndaşları olan
əmanətçilərinə fərdi birdəfəlik ödəmələrin verilməsi qaydaları haqqında fərman imzalayıb. Bu qaydalar 1992-ci ilin 1 yanvar tarixinə keçmiş Əmanət Bankında
şəxsi əmanət hesablarının qalıqlarını saxlamış Azərbaycan vətəndaşlarına və onların varislərinə aiddir.
Ödəmələr Kapital Bank tərəfindən 2012-ci ilin iyun ayıdan 2013-cü ilin 31 dekabrına kimi veriləcək. Fərdi birdəfəlik ödəməni
almaq üçün 2012-ci ilin 31 dekabrına qədər Kapital Banka müraciət etmək lazımdır.
Birdəfəlik ödəmə, əmanət qalığının məbləğindən asılı olaraq, aşağıdakı cədvəldə müəyyən edilmiş qaydada hesablanır:
| əmanət qalığı (manat) | hesablanma qaydası |
| 0,04 manata (2000 rubla) qədər olduqda | Əmanət qalığının hər bir qəpiyi üçün 75 manat |
| 0,04 manatdan 0,1 manata (2000 rubldan 5000 rubla) qədər olduqda | 300 manat + 0,04 manatdan artıq olan əmanət qalığının hər bir qəpiyinə 50 manat |
| 0,1 manatdan 0,2 manata (5000 rubldan 10000 rubla) qədər olduqda | 600 manat + 0,1 manatdan artıq olan əmanət qalığının hər bir qəpiyinə 40 manat |
| 0,2 manatdan (10000 rubldan)yuxarı | 1000 manat + 0,2 manatdan artıq olan əmanət qalığının hər bir qəpiyinə 25 manat |
Sovet əmanətlərinin AZN kalkulyatorunu yükləyib, özünüz lazım olan məbləği hesablaya bilərsiniz.
Həmçinin Maliyyə nazirliyində vətəndaşların suallarını cavablandırmaq üçün qaynar xətt açılmışdır. Vətəndaşlar iş qünlərində
saat 09:00-dan 18:00-a qədər onları maraqlandıran suallarla 012 404 46 03 telefonuna zəng edə bilərlər. Bundan əlavə
emanet_info@maliyye.gov.az adresinə də müraciət etmək olar.
