 Martın gəlişi ilə Sarıda camaat aktivləşib. Hələ dünən "pensiyalar" (Sarının yeganə gəlir mənbəyi) da verilib. Qarşıda isə Novruz bayramı gəlir. Bazarımızda, dükanlarda yaman canlanma var. Uşaqlar təzə paltar geymənin, yumurta döyüşmənin arzusunda olduqları vaxt, onların valideynləri başqa işlərlə məşğuldurlar. Kimisi indidən ərzaqlarını alır, kimisi pul toplayır. Bir sözlə, hər kəs öz tədarükündədir. Adətlərimizdən biri də bayram təmizliyidir. Bəxtimizdən havalar da yaxşı keçir. Əhəngləmənin, ev-eşiyi rəngləmənin tam vaxtıdır. Hamı qışın tüstüsünü, hisini yuyub-təmizləyir. Kəndimizin də ən məharətli əhəng verəni öz fırçasını əlinə alaraq, özünəməxsus virtuozluqla işinə başlayıb. Artıq ağaclar, idarənin çəpəri əhənglənib. Növbədə hələ bir çox yerlər var. Bu gün hətta qəsəbənin lap mərkəzinə bir-neçə maşın qum da töküb yayıblar ki, əhalinin bayram qabağı əhval-ruhiyyəsi qalxsın. Amma içəri məhəllələrdə yaşayanları bu sevincdən məhrum ediblər. Bəziləri bunu onunla izah edirlər ki, guya Sarıya ATV kanalından nəyisə çəkməyə gələcəklər və bütün bu təmizkarlıq oyunu onların şərəfinədir. Ya zəlzələdəndir, ya vəlvələdən.
P.S. Nərimanabad bazarında kerosinin qiyməti 80 qəpiyə qalxıb. Ekspertlərin rəyinə görə qiymətlərin yenə qalxması gözlənilir. Bunu təklifin tələbatdan az olması və nöyüt bazarındakı monopoliya ilə izah edirlər.
My Great Web page Нравится
|
